![](http://dev.consorcio-santiago.org/sites/default/files/styles/large/public/multimedia/images/2015/02/sar2.jpg?itok=WW78tuSl)
O Consorcio de Santiago interveu durante varios meses no Multiusos do Sar, co propósito de atallar o problema das filtracións pluviais no interior do edificio. Os traballos, levados a cabo pola empresa Proyecon Galicia, S.A., tiveron un orzamento global de 95.469 euros.
Xosé Allegue é o arquitecto da Oficina Técnica do Consorcio de Santiago responsable deste proxecto. Explica que abordaron dous ámbitos de actuación no edificio, por tratarse dos dous focos dos que xurdían as filtracións de auga. En primeiro lugar, interveuse sobre o corredor superior perimetral da cuberta plana. E, por outro lado, actuouse sobre a cuberta de cobre inferior perimetral.
A intervención na cuberta superior
A cuberta plana superior dispón dun corredor perimetral de fibra de vidro que se atopaba en mal estado e con diversas roturas, como consecuencia do esgotamento da vida útil do material. Estas roturas facilitaban que a auga da chuvia pasase ao interior do edificio.
Tal como informan os técnicos do Consorcio, a intervención na cuberta superior centrouse na retirada da fibra de vidro deteriorada. Procedeuse á limpeza da zona e aplicouse un sistema de impermeabilización.
A intervención na cuberta inferior de cobre
Por outro lado, “o faldrón perimetral inferior, construído con paneis sándwich de cobre, dispón de cubrexuntas que se desprenderan ou se desprazaran en moitos casos, seguramente por obsolescencia das grapas de fixación e pola acción do vento, polo que perderan a súa capacidade de estanqueidade” -sinala Xosé Allegue-.
Neste caso, a intervención consistiu no repaso e refixación da totalidade de tapaxuntas de cobre nas xuntas dos paneis. Substituíronse as grapas en mal estado e realizouse un selado previo das xuntas con resinas especiais.