No marco das actuacións que o Consorcio de Santiago leva a cabo no patrimonio do termo municipal, e moi estreitamente relacionado coa cidade histórica e os Camiños de Santiago, vaise intervir na igrexa de Santo André de Barciela, situada na parroquia homónima. Esta actuación conta cun orzamento global de 37.412,32 euros e ten un prazo de execución previsto duns tres meses.

A arquitecta da Oficina Técnica do Consorcio responsable deste proxecto é Lourdes Pérez. Sinala que a intervención centrarase na cuberta e nas fachadas do inmoble. E explica que “toda a estrutura vertical e horizontal da igrexa atópase en bo estado de conservación. Non así a cubrición de tella, que está envellecida, con pezas fisuradas e rotas. Ademais, a tella da metade inferior de todos os faldróns ten sufrido corrementos, co consecuente perigo de caer á vía pública”.

A igrexa presenta tamén problemas de filtracións da auga da chuvia polos beirados das fachadas lonxitudinais. As fachadas exteriores están protexidas con revoco en bo estado de conservación, aínda que o acabado de pintura necesita dunha renovación.

Por outro lado, o templo contén no seu interior tres retablos, un principal no altar e dous en posición lateral. “A madeira destes retablos está afectada pola couza, polo que urxe unha rápida intervención de cara á súa eliminación” -indica a arquitecta-.

As actuacións no templo

Na cuberta substituirase a cubrición de tella por outra nova de características semellantes á actual. Nas fachadas exteriores do edificio aplicarase unha pintura acrílica microporosa, transpirable ao vapor de auga. E ante a afectación pola couza dos retablos, procederase á súa interceptación e eliminación, antes de que comecen a afectar á estrutura de madeira do inmoble.

A igrexa de Santo André de Barciela celebra este ano o centenario da súa construción, xa que se trata dun templo modernista construído en 1917.