O Consorcio de Santiago publicou este luns 20 de abril na Plataforma de Contratación do Sector Público dúas novas licitacións para a execución de intervencións en dous bens de elevado valor patrimonial da cidade, o conxunto de Santo Domingo de Bonaval e o Pazo de Raxoi.

A intervención no conxunto de Santo Domingo de Bonaval refírese en concreto á obra de restauración da nave de acceso ao Panteón de Galegas e Galegos Ilustres do Panteón de Galegas e Galegos Ilustres e da capela que alberga o sepulcro de Castelao. O obxecto da intervención é a restauración integral do conxunto actuando sobre as patoloxías detectadas, fundamentalmente humidades, filtracións e deterioro de revestimentos e pinturas murais que afectan tanto á nave de acceso como á capela. A actuación permitirá recuperar as condicións de conservación do espazo e garantir a protección dos seus valores patrimoniais e artísticos. O orzamento base de licitación con IVE desta obra ascende a 122.829,34 euros, e o prazo de presentación de ofertas para esta licitación remata o 11 de maio de 2026.

Por outro lado, a licitación no Pazo de Raxoi corresponde á obra de mellora da eficiencia enerxética da fachada norte, co obxectivo de mellora do comportamento térmico da envolvente do inmoble e a corrección das patoloxías detectadas relacionadas co envellecemento dos materiais e coa acción de factores ambientais que provocan problemas de humidades, filtracións e deficiencias de estanqueidade. O orzamento base de licitación con IVE desta actuación ascende a 617.856,76 euros e o prazo de presentación de ofertas para esta licitación remata o 18 de maio de 2026..