Na Casa do Cabido, na Praza das Praterías, remata este xoves a exposición “Santiago de Compostela en branco e negro”, unha mostra de 53 fotografías de Alberte Peiteavel promovida por Teófilo Comunicación en colaboración co Consorcio da cidade. Esta exposición permite facer un percorrido pola arquitectura compostelá e pode visitarse ata mañá.

Aproveitando esta clausura, o Consorcio convida a todos os cidadáns e visitantes a asistir a un curioso espectáculo na segunda planta do edificio, dende o venres pola tarde e durante toda a fin de semana. Os interesados terán a oportunidade de ver, en total escuridade, a imaxe da Torre do Reloxo da Catedral proxectada de xeito invertido nas paredes do interior do museo.

As cámaras escuras representan a orixe da fotografía e o cine

En 2011 o Consorcio rehabilitou a Casa do Cabido, que se adaptou para o seu novo uso cultural. Daquela, a orientación norte da súa fachada e a distancia desta co muro paralelo da parede medianeira posterior inspirou a idea de converter as diferentes salas do edificio en cámaras escuras, que representan a orixe da fotografía e do cine. O deseño das contraventás de madeira permite a escuridade total interior, de xeito que, a través de minúsculos orificios, nas salas penetran os raios reflectidos coa imaxe do fluír da Praza das Praterías, a fachada da Catedral e a Torre Berenguela; proxectándose invertidas sobre a parede medianeira.

O efecto “cámara escura” recreado na Casa do Cabido permite experimentar a sensación de estar no interior dunha cámara fotográfica. E ofrece momentos máxicos coa proxección do fascinante escenario urbano da Praza das Praterías sobre as paredes interiores do edificio.

Poderase gozar deste espectáculo no horario habitual da Casa do Cabido, dende o venres de 17:00 a 21:00 horas; o sábado de 10:00 a 14:00 e de 17:00 a 21:00, e o domingo de 11:00 a 14:00 horas. Dende o Consorcio lembran, ademais, que mañá xoves, día da Ascensión, a entrada ao Museo das Peregrinacións e de Santiago, tamén na Praza das Praterías, será gratuíta.